With all due respect ngadto ni Cebu City Councilor Hilario Davide III akong tan-aw maglisud gyud siya ug pilde kang Gov. Gwen Garcia kun modayon siya ug lansar pagka-gobernador.

Mahug lagi sa panultihon nga siya maoy gibala sa kanyon.

Gani ang uban nagkanayon nga humok pa’s mamon pildehon si konsehal Davide ni Gwen.

Alang nako mas maayo nga usa ka credible Osmeña ang mosakbang batok ni governor Garcia aron alegre ug panington sab ug bugbog ug aron makita ang katag.

Puwerte’ng daghana sa mga Osmeña ang nagtinguha nga molansar dinhi sa dakbayan sa sugbu karong umaabot eleksiyon.

Si first lady Margot Osmeña maoy bag-ong kaplag sa BO-PK nga padaganon pagka-konsehal sa Cebu City south district.

Si kanhi senador Sonny Osmeña mag-mayor sab kuno.

Mangambot lang ko kun unsay mahitabo ni Vice-mayor Michael Rama kun hugpa-an na ang City Hall sa mga Osmeña.

* * *

Usa ko sa mga nagduda niadtong gihimong operation sa National Bureau of Investigation (NBI) sa Estaca, Compostela batok sa notadong pundok sa mga tulisan nga gipanguluhan ni Alvin Flores.

Dili kaha to rubout? Unsa may ilang gitaguan nga mibabag man sila sa mga sakop sa media nga makasulod didto?

Alang nako wa gyu’y rason ang ilang pagbabag sa mga sakop sa media kay dili na baya risgo ang sitwasyon niadtong tungura.

Gawas pa well-trained na ang mga tigbalita. Nasayod na kun unsa-on pagtabang sa mga otoridad pag-preserve sa crime scene.

Gihipos dayon nila ang mga empty shells kay ang tinuud wa gyud makasukol ang upat nga napatay?

Maulaw sila nga makuhaan ug video nga over-kill ang ilang gihimo sa upat nga nangamatay?

* * *

Dili maayo’ng balita ang misugat kanamo niadtong sayo’ng kadlawon sa Nobyembre 2 pag-abot namo sa among panimay sa Casay Dalaguete kay ang akong pinanggang inahan napugos ug uli sa among panimay gikan sa sementeryo kay matud pa gibato sila ug mga hubog.

Puwerte kuruga intawon sa tuhod sa akong inahan tungod sa nahitabo.

Sukad nga daghang mangatulog sa sementeryo panahon sa Kalag-kalag, wa na gyu’y palta ang akong inahan nga mo-apil usab sa panon uban sa akong mga igsoon ug mga pag-umangkon nga adto mangatug sa gilubngan sa among pinanggang amahan ug sa duha namo ka mga igsoon ug usa ka pag-umangkon.

Apan naputol ang gi-practice sa akong inahan karong tuiga tungod kay gibato sila sa mga hubog nga mga batan-on.

Wa gyud ko mahimoot dihang akong gisubay ang estorya kay ako mismo lantaran kaayo ang inom sa mga tawo nga anaa sulod sa sementeryo sa Santa Monica Parish Church nga anaa sa barangay Cawayan.

Naglibog lang ko kay dinhi sa Siudad sa Sugbu sobra ka-estrikto kay dakpon gyud ang mga hubog ug bawi-an kadtong magdala ug ilimnong makahubog.

Pero didto sa among sementeryo way pu-as ang pagsulod sa mga ilimnong makahubog.

Ang daku’ng pangutana, mitugot diay si S/Supt. Jesus Gacquing sa iyang mga tawo sa kalungsuran nga pasudlon ang mga bino ug beer?

Asa man diay ang mga tanod? Nag-una-una ug tagay?

* * *

Pagkalooy tawon sa akong suki ug barbecue sa barangay Lahug nga si nang Aniceta Sanchez kay napaig ug apil sa sunog nga miigo diha sa sitio Bayanihan, Lahug niadtong Lunes sa gabii.

Kun nahinumdum pa kamo sa mga balita kaniadto nga dunay barbecue vendor sa may JY Square nga gihagisan ni Mayor Tom Osmeña ug gipangtunob-tunoban ang mga barbecue, mao ni sila’ng pamilyaha.

Ang bana niining Aniceta nga si Willer Sanchez nga taud-taud na sa’ng namatay mao gyud to siya ang na-engkuwentro ni Mayor Tom.